Luciano Bernard Inno ala Val de Non

Luciano Bernard de Vic de Ton, el s’è semper dedicià al so paes, ala so zent, con en gran “volontariato”, enta biblioteca, entai ECA, entel coro. L’è stà ancia organista e l’à semper aidà la so zent tut le bote che i geva bisogn. La so gran pasion l’era el studio, dala poesia ala leteratura en zeneral, dala storia ala economia, dale lingue ala medizina, al ziornalismo. Umile de gran cultura, l’era bon de scriver parole e musicia, far cianzon en talian e en nones. Da om gran inteliziente el scriveva con na fazilità che empareva che i versi, le rimele, i pensieri, le descrizion le nides fuer dal cuer e dal zervel par cont so. L’è sin nà da sta tera el 26 de genar del 2014.

Entel liber “Nonesarie” che en publicià cola Rezia e Radio Set Larsi tanti ani fa, tra le prime poesie gè propi “Inno ala Val de Non” del Luciano Bernard da Vic, na poesia ecezionale dediciada ai beleza e la straordinarietà dela nosa val: el splendor dele montagne en mez al vert dei pascoi, dei avezi, dei pini, enten spetacol de Paradis che el fa gola a tuti. Subit sota pradi e pascoi che empar de eser tornadi al epoca dela Bibia cole valete fonde e plene de mistero, propi come ai primi tempi de l’umanità. E en mez ai bosci e dria ai tanti ridi de aca, se partezipa an conzerto dei auziei, che i cianta con n’armonia che empar propi de eser en Paradis.

La descrizion del Luciano la seghita con versi, espresion e parole ecezionali, che me par de goder la beleza dela val d’en temp, prima che i la emplenisia de pomari dapartut, senza lagiar calche paesazo dela natura, i paesi e paesoti empar splazi blanci ‘nta beleza dei bosci e de grant plante verde. Gè strofe ecezionali che le recorda l’armonia e la beleza dela vita en ciampagna de tanti ai fa.

No puel manciar el Tovel, el Peler, cola so straordiarietà che el se distingue dale autre val par la beleza e la posibilità de goderli. El poeta el descriu con versi potenti la straordinarietà dela nosa zent e noi poden dir spezialment chele d’en temp, che me distinguen ancia ades, come onesti, laorentoni e amanti dela natura. Parole che empar musicia, rime liziere, endovinade, che te par scasi de veder le persone e i posti o le ciase e tut el panorama dela Val de Non: “Val de Non, val de Non, tuta verda, tuta bela, te voi ben propi dalbon”.

Inno ala Val de Non Luciano Bernard de Vic de Ton

Zime vestide de cadida néo

splendòr etèrno che brila col sol,

e àotre scüre, scoertade de avezzi,

de larsi e pini, de mügi e de pézzi.

Sot g’é pradi e pascoi verdi,

cole malge e le cjasare;

g’é lageti de aca püra

e chel da Tovel che ‘l vèn ross.

G’è le val, fonde e ‘ntaiade

dent ài cròzzi ch’è sü a piombo,

l’aca limpida che sgozza

zo ‘nfrà ‘l müszo ‘n te na pozza.

Anfrà i bos’ci g’è ‘n conzèrto

de aozzelòti cjantarìni,

che i compagna ‘l viàz da l’aca,

‘ntànt che i sgola ‘ntórn ai pini.

Sot se slargja la valada

coi so plani e le coline;

se vet ent enfrà i pomari

splazzi ‘n blanc di bèi paesòti.

E la vita scor serena

‘nfrà la cjasa e la cjampagna:

ci la zènt i è Tuti onèsti,

i laora e ‘ncja i sparagna.

[…]

Val de Non, Val de Non,

Tuta verda, Tuta bela,

te vöi ben pròpi dalbòn!

Le tò zime blance e verde

e ca rossa ‘nfrà i glazzón

le fa ‘nsèma la bandera

da la nòssa nazión.

[…]

Dent g’è tanta bona zènt:

laorànti e contadìn,

ìo che i sgòba e che i sparagna:

s’cjarpón gròss ma, zervèl fin.

[…]

Noi te fen i complimenti

che ‘n te l’anima sentìn:

Val de Non, Val de Non,

sès la pèrla dal Trentin.