Maurizio Paternoster, il cantante poeta

El Maurizio Paternoster dal Raut de Ton, l’è propi brao, come menestrello, animator, ma ancuei vel presenti con doi poesie.

ME NONA – L’è en ricordo e na descrizion ecezional, plena de grant sentiment, de recordi che g’è amò entel cuer, sula pel, enti brazien tut i nosi muscoi.

La nona no la podeva ciargiar e desciargiar el fen che alora l’era tant e che se portava a ciasa o a brazi o coi ciareti o coi ciari a cater ruede tiradi dale vace. Empar de parlar de secoi fa, ma chesto l’en vivest noi autri nati entel dopo guera, almen fin ai ani 60 -70.

Chel che podeva far la nona ormai za vecla asà, l’era de sciaudar la menestra e de vardar zo dala finestra par en “sostegno morale”, ancia eser boni a desciargiar e zerciar de veder la ciamereta dela nona l’era na speze consolazion: l’è vera che se ciapiva come la vita dei tempi de la nona la era pu dura e pu grama dei neodi che desciargiava el fen, ma dala finestra averta se entravedeva el crozifis, che forse l’era en segn e na presenza de consolazion.

El ricordo del poeta dela vita dela nona l’è plen de na soferenza che se enfilava ente interiora. E però ancia se g’è sta na vita plena de soferenza, la nona la era bona de lezerse el ziornale, che el gi fava forse pensar come l’è brut star da so posta, dopo na vita strusiada. Ma gera ancia en chesta nona, come de segur en tante autre, na forza de sentiment e de corazo che gi luseva persin i ocli. E la giatava la nona en sistema come de segur le so coscrite o scasi, e no manciava segur la voia de pregiar “vizin ala sciaudina”.

ME PAPA’ – Sta poesia la è plena de strani, de recordi de vecli tempi, ma de en grant amor che diesine de ani fa geven tuti canti par le bestie, spezialment par le bestie dela stala, che en pratica le viveva ensema a noi. La è propi comovent la poesia, e l’è de testimonianza de come ai tempi del poeta, ma ancia ai miei, gi naven dria al papà o al nono o ala mama par monzer le vace.  El poeta el nava semper dria al papà entà stala e canche el geva autri mistieri ma el meo el lo zerciava fin a cant che el lo giatava e col papà el nava enta stala, el recordava i ani dei oni e dele pasade zenerazion.

El popo Maurizio nol laiava so pare e nancia le vace: el stava entà stala finché tute le vace le era monzude, ma ogni tant gera ancia en vedelot che el gi tegniva ciaut e con gran piazer el lo tegnica “bel tebi”.

Come tanti a chei tempi i voleva ben e i tratava le bestie e i vedeloti, e le obediva che bastava n’oclada.

En bon nones gen da recordar e esergi grati ai nosi vecli e ale nose mame e none, che le me à laià forti e grant testimonianza den pasato che ades el me permet de star ben. 

ME NONA

Me nona mi me la ricordi ben

sentada zo dinanzi ala finestra

vardarne zo che desciargiaven fen

s-ciaudarse na scudela de minestra.

               An la so ciamereta ciauda e scura

               col crozifis de sora al ciassabanc

               la feva trasparir na vita dura

               na vita con tant neger e pòc blanc.

Nola parlava mai dele strussiade

che vedova de guera l’eva passà

dei so dolori, dele soferenze nade

e i fiöi con sacrifizzi l’ha arlevà.

               Daosìn al so fornel a cherosene

               la se lezeva plan planin al foli

               pensando forsi ale so mili pene

               e a come che l’è brut sentirse soli.

Ma cando s’neva a dirge bonanot

ge se ‘npizava ‘nti ocli na flamota

e dal ciassabanc, adasi e una al bot

la ne tirava för na zirelota.

               Antel paion la sera col coprilet de ortigia

               la se butava zo ‘nfin la matina

               per para via dal tut la so fadigia

               pregiando an pöc, vizzin ala s-caudina.

Maurizio Paternoster dal Raut de Ton

ME PAPÀ

Cando geven le vacie zo ‘nla stala

sti ani che mi eri ‘n putelot

clamavi me papà io ‘nte la sala

prima de nar a monzerle una al bot.

               Cando che ‘l neva zo senza spetarme

               mi ge corevi dré tut azità

               no gera migia versi de fermarme

               perché volevi nar con me papà.

Dopo, an la stala, antant che el al monzeva

el me contava dei so vecli noni

de cando sule bestie i ge viveva

de ani de miseria e de ani boni.

               Mi l’ascoltavi e ‘ntant vardavi al lat

               nir zò ‘nla zèla che la se ‘npleniva

               vizzin an vedelot apena nat

               che io daosìn, bel tebi ‘l me tegniva.

Al le tratava ben le so bestiote

mai pache, sol na calche brontolada

e le filava drit tute le bote

che sol al ge petava via n’oclada.

               La stala però adess, l’en trasformada

               l’è bagno, magazin, no l’è pù chela;

               denter de mi però, no la è cambiada

               l’è me papà, che ‘l monz, co la so zèla.